馬祖少年世代吹來回鄉的風，替外島帶來新生機！｜青春咱的夢

【馬祖藍色珠淚下的青年】

中國文旅部佇4月28號宣布，開放中國福建民眾到馬祖旅遊。消息一出，陸委會就隨表示，干焦開放福建居民到馬祖，煞無金門佮澎湖，相關的安排嘛無符合對等開放原則，這毋是觀光旅運應該有的情形。

離島馬祖經歷過戰地政務時期，島上四界會當看著彼當時的反共標語。解嚴了後，嚴肅緊張的氣氛消失去，藍色珠淚帶來的經濟效益予馬祖轉型做觀光的縣市，吸引愈來愈濟少年人回鄉經營觀光資源。就算兩岸地緣政治關係一直咧變化，這陣少年人猶原堅持，向望共馬祖的媠推廣到國際，予閣較濟人見證這片土地的魅力。

公視臺語台《青春！咱的夢》6/8這禮拜六暗時7點半，欲共逐家講這陣馬祖青年是如何拚勢咧宣傳家鄉，佮如何看兩岸之間的關係。