營養午餐敢食安心、林下經濟 林農新路｜台灣記事簿
發布時間: 2024-02-29
【營養午餐敢食安心】
學校營養午餐予學生仔攏食甲真歡喜，甚至有的囡仔，目一𥍉就全部捽了了。 毋過兒童福利團體調查，猶有8成的學生感覺食袂飽。 教育部咧講，營養午餐將近100%攏符合農產品標章的規定，毋過猶是四常會出現食安疑慮的新聞報導。 北市內湖有小學食著金屬的針管、基隆一間高中的點心麭有毋知影名的蟲。 學校營養午餐的問題，到底是出佇咧佗位咧？
【林下經濟 林農新路】
靠種樹仔趁錢，需要耐心來等待，林農煩惱等袂著下一代傳承，世代傳承的產業咧欲消失去。毋過，2019年農委會開放林下經濟了後，代誌開始迎來轉機。佇咧阿里山公路47.4公里的番路鄉公興社區，這个社區43公頃的樹林，有九成攏是國有林地。佇遮有一百外戶的人家厝，𪜶大多數攏是共政府租林地咧討生活。林下會當種香菇、金線蓮、飼蜂等等，林地經營的新產業敢會當順利發穎？
3/3 禮拜日暗時七點半，綴台灣記事簿先來了解學生仔營養午餐的食安問題，閣來看咱台灣的林下經濟行出林農新路。
