馬太鞍的自然啟示、Action！校園人權轉譯｜台灣記事簿

【馬太鞍重建三部曲（二）馬太鞍的自然啟示】

馬太鞍溪做大水了後，地形地貌攏總改變。崩山湖溢流衝落來的塗沙，有到3億立方公尺，佇咧中段的溪埔積4、 50公尺懸，水尾嘛有積3公尺至5公尺懸。

為著欲監控馬太鞍溪的崩山湖，空勤總隊的烏鷹直升機，載無人艇佮水位監測設備，飛去到崩山湖現場勘查；另外閣有林保署花蓮分署組成的特遣隊，分兩批進入山區，勘查地質佮水文。

這个事件佇專家看來，毋是單一的自然災害，是一个複雜的系統性問題，是地質、水文、監測，和防災措施失靈造成的災害。對這場災難，人類會當得著啥物款的教示？未來敢有法度做閣較好的防災準備？

【Action！校園人權轉譯】

七月初，佇成功大學成功校區有一場校園人權走讀，是由學生𤆬校內的教職員，做伙熟似成大的歷史事件；這陣工作隊的成大學生，除了佇學校舉辦人權走讀，嘛佇校外佮七間高中職，閣有大學的師生，做伙辦跨校人權轉譯聯展，希望予閣較濟人有機會用無仝款的角度看歷史。

108課綱開始有轉型正義課程，這馬閣有大學共人權走讀列做必修課程，轉型正義佇校園進入一个新的階段，嘛予人更加期待，有愈來愈濟無仝階段的學生，會當對台灣的轉型正義有閣較深的了解。

11/23禮拜暗時七點半，台灣記事簿先𤆬你繼續關心花蓮馬太鞍災情後續，紲落才來看一陣有理念的學生，按怎佇校園內底辦走讀佮展覽，𤆬逐家熟似台灣的歷史。