台語台出來káng—花蓮場(公共問責)

台語台出來káng—花蓮場 活動紀錄

時間：2023年 8 月 25 日 (五) 19:00-20:30 

地點：璞石咖啡x光之島共享空間(花蓮縣花蓮市明禮路8號) 

講者：呂東熹/台語台 台長 

張瑞夫/《無事坐巴士》主持人

王逸嘉/《行仔內ê話》主持人

主持人：莊靜茹/行銷企劃

 

台語台頭一逝花東之旅 

咱邀請王牌節目《無事坐巴士》

緣投主持人張瑞夫

全新猶未播送的新節目《行仔內ê話》

古錐主持人王逸嘉

閣有台語台大家長--呂東熹台長

欲做伙分享台語台

這寡年成長的一步一跤印，猶有逐家上愛聽的主持人甘苦談。

 

Ⓞ以下是活動紀錄全文

(影片放送)

台語台行銷企劃—莊靜茹：

歡迎逐家佇拜五的暗時做伙來參加台語台出來káng，我是台語台行銷企劃部的靜茹，嘛是今仔日的主持人。這是公視台語台頭一擺來花蓮佮逐家見面，嘛希望會當透過這改的活動予逐家閣較熟似阮台語台；所以阮除了邀請台語台的台長，嘛有邀請節目的主持人來到現場，欲佮逐家做伙開講，閣會當看著全新、猶未放送的新節目。

先來紹介三位今仔日的講者，頭一位就是阮台語台的大家長—呂東熹台長，紲落來第二位是阮節目《無事坐巴士》的主持人—張瑞夫，最後第三位是阮的新節目《行仔內ê話》主持人—王逸嘉，閣有阮行銷企劃部的劉桂蘭經理。

逐家敢知影台語台佇第幾台？無毋著！阮就是佇14台。若是你厝內無電視嘛無要緊，因為阮佇網路頂懸—Youtube嘛會當收看，予你的生活中有滿滿的台語。我相信有的朋友對阮台語台無講蓋熟似，所以就請阮台長來好好仔紹介台語台這四年來的成長跤跡。

台語台台長—呂東熹：

台語台是17、18年前開始推捒，2008年猶是捒無成，本來欲佇高雄釘根。到2016年新政府承認了後閣開始推捒，佇2018年公視就開始籌備台語台，因為政府開始編預算。阮2018年落手籌備，2019年的七月初一試播，七月初六就正式放送，較無一冬的時間阮台語台就佇14台開始放送。

是按怎當初會成立台語台？因為彼陣社會團體有兩个訴求，一个是語言平權，另外一个是區域平衡。2003年創立客家台，2005年創立原住民電視台，2006年本來欲開始籌備台語台，毋過12年以後才正式籌備台語台，因為2018年《國家語言發展法》才通過；台語台就是佇這个狀況成立的。當初社會團體除了訴求語言平權，另外一點就是區域平衡。所以阮今年六月初三佇高雄成立南部中心，舊年的九月已經開始錄影，十月開始放送。所以阮這馬佇南部有8个節目，北部這馬節目真濟，有五節的新聞、戲劇佮綜藝。

阮的戲劇因為拄才創立，預算較少，干焦三億。公共電視台拍一支《斯卡羅》、《茶金》就開幾億去矣，阮台語台閣較有創意，預算嘛才三億爾爾，你若拍一支片、拍一支連續劇，其他節目就毋免做矣。所以阮拄開始的時陣無強調戲劇，毋過今年開始阮就有規劃足濟的戲劇，因為戲劇較會當吸引觀眾來看；明年的戲劇這馬嘛攏已經咧推捒。毋過戲劇的缺點就是真慢，伊愛有劇本，而且劇本嘛愛揣著適當的人去寫，寫出來才有法度開始拍片。

話講倒轉來，阮今仔日阮是按怎欲來東部？其實阮自創台開始已經佇西部、澎湖佮外島辦過類似這種的活動，毋過東部攏無，雖然我知影在座無一定攏是花蓮人，會走來遮的嘛是對阮真支持。台語台對創台開始收視率就一直咧提升，2019年七月初開始放送以後收視率就起來矣，毋捌看過一个新創立的台有這種成績，通常都愛真濟冬才有法度，阮第一年就起來矣；表示講阮台灣社會對台語台有一種期待。上主要的是今仔日來參加的人，若是對台語台抑是對阮的主持人有啥物期待，攏會當和阮分享。

阮的主持人—逸嘉，有一个新的節目11月欲開始放送，等一下欲紹介恁熟似。瑞夫我是第一遍看著，以前攏佇電視看，伊原底是阮節目採訪的對象，後來變節目的主持人；《無事坐巴士》閣有另外一个主持人是佇小琉球開旅宿的頭家。另外閣有一个節目號做《收成ê彼一工》，彼个節目其實是阮公開對外去徵選大學生，這幾个主持人攏是少年仔，而且毋捌主持過，完全就是阮公開徵選，來報名的人錄取了後阮去共訓練，訓練了後內底揀一寡袂䆀的留落來，真正主持甲足讚的！今年閣有報名金鐘獎喔！而且內底閣有3个猶閣咧讀冊，所以阮台語台希望會當有閣較濟少年人來參與。

台語台行銷企劃—莊靜茹：

感謝台長的分享，逐家應該有閣較熟似阮台語台，希望逐家會當共阮多多支持！頭拄仔台長嘛有講著阮一个節目，就是《無事坐巴士》，逐家敢有看過？

好，《無事坐巴士》其實是台灣頭一个用巴士做主題行跤的節目，節目當中主持人坐巴士thuh全台灣，透過在地人的報路，𤆬逐家閣較熟似在地的產業、好食物、文化佮特色，所以阮這馬就綴瑞夫的跤步，看伊欲𤆬咱去佗位𨑨迌。

(影片放送)

台語台行銷企劃—莊靜茹：

逐家看了敢有想欲坐巴士去𨑨迌？

這爿有一寡問題欲來問瑞夫，頭拄仔台長嘛有講你進前是受訪者，尾仔就接做主持人，你感覺你的台語敢有因為主持台語節目的關係變閣較好？

《無事坐巴士》主持人—張瑞夫：

有，老實講我自細漢就是講台語大漢的，讀幼稚園以後才會曉講國語，後來去台北讀冊才發現講台語的人愈來愈少，雖然講每個月轉去厝裡攏會佮阿公、阿媽講台語，毋過佇學校佮同學講話攏袂用台語，所以台語會退步。

阮這个節目一改出去就是錄影五工，這五工我毋管對象是啥物人，攏是佮𪜶講台語，所以語言的語感真正有變較好；猶未錄這个節目進前，有一寡話需要想真久，因為有當時仔無法度轉換。毋過錄節目的時，你的反應愛足緊的，你馬上就愛想著，所以一定有進步。

台語台行銷企劃—莊靜茹：

你欲去雲林體驗這个工課的時陣，你彼陣的想法是啥？佇體驗了後你對這个工課的想法敢有啥物改變？

《無事坐巴士》主持人—張瑞夫：

影片內底的查埔真正是我的同學，我感覺這个節目有一个足心適的所在，是阮有當時仔會當建議想欲去佗位，拄好這改去雲林有揣著我的同學。我佮彼个同學以前是讀藝術管理的，伊去紐約做藝術，結果因為厝裡需要伊，所以伊就轉來接豬仔場。彼當陣阮讀研究所的時，我捌共𪜶兜的豬仔搬去阮學校，作品號做『豬豬上學去』，我嘛當做𪜶兜是一般飼豬的。

伊對美國轉來以後，我猶是毋捌去過𪜶兜，仝款會好奇𪜶兜是生做啥款，結果哪會知影講𪜶兜是飼豬哥、豬母的。一開始想講加加看豬仔是按怎拍種，結果我哪會知影是人愛騎起去，有足濟代誌是我真正想袂到的。

所以看著這个本，一開始想講會是一个癩𰣻、垃圾的所在，結果我去的時才發現毋是。去進前真正愛閣共家己的身軀洗清氣，閣愛換𪜶消毒過的衫，褪落來的衫閣愛另外囥一區，而且入去看豬仔進前，跤仔手都愛閣消毒過。所以其實去這寡所在的意義，就是阮會當真正去熟似每一个行業𪜶這途到底咧創啥，可能嘛會予真濟少年家願意轉去故鄉接𪜶老爸、老母咧做的事業。

台語台行銷企劃—莊靜茹：

這遍去雲林的錄影敢有拄著予你印象較深的代誌？

《無事坐巴士》主持人—張瑞夫：

毋知頭拄仔騎豬哥敢有印象，這是一種畫面上的趣味；這集內面閣有另外一段差不多十至十五秒，毋過我的印象誠深。阮去二崙買煎包的時陣，因為我真正無看過煎包，所以就共問：「頭家，你這是啥物物件？」邊仔有一个阿伯買十塊，聽我咧問就直接提一塊予我，而且共我講：「你食看覓。」閣無愛共我收錢。彼毋是講好的，阮嘛完全無熟似。我拄欲佮伊開講，伊就講：「我欲先趕轉去予厝內的人食矣。」伊就駛車走矣。

我感覺這人情味真難得，你敢會想講咧路邊共人問一下，結果邊仔有一个人共伊買好的提予你食，所以這是我錄影過程感覺上意外，嘛感覺上特別的一件代誌。

台語台行銷企劃—莊靜茹：

逐家頭拄仔無看著的畫面，對瑞夫來講煞是上趣味的代誌。

《無事坐巴士》主持人—張瑞夫：

著，這集若是去揣就會當看著，雖然這是內底其中一段爾，毋過這一二十秒對我來講印象實在傷深。

台語台行銷企劃—莊靜茹：

除了這段你感覺閣有其他的無？

《無事坐巴士》主持人—張瑞夫：

閣來講足特別的。雲林這逝除了揣我的同學，閣有揣一个朋友，伊佇西螺豉豆油，伊是第三代；伊有𤆬我去熟似一个賣冰的。佇這集內底閣有熟似台灣野球的國家選手，因為按呢才發現台灣的女子野球的資源足少；𪜶最近咧雲林集訓，欲參加世界盃。所以我就揣影片內面賣冰的買冰，送去女子野球隊，請𪜶食冰。

我感覺錄這个節目上心適的是我會當熟似真濟在地的少年家，你佮伊交陪了後，知影𪜶為著家鄉、為著家己厝裡做的一寡代誌，就會想講：「著，我可能嘛愛像𪜶仝款，凡勢我嘛會使為這个社會抑是家鄉做一寡代誌。」因為這个信念，𪜶就全部攏牽鬥陣，做一件代誌逐家攏會當互相影響，我就感覺足好的！

我補充一个，頭拄仔主持人問：「我台語有變好無？」其實有一个變好的依據，就是我會使去想地名愛按怎講。 

台語台台長—呂東熹：

毋過你頭拄仔lī-lūn讀做lī-lûn，在地人講lī-lūn毋是lī-lûn。

《無事坐巴士》主持人—張瑞夫：

這心適的所在是因為逐擺欲去無仝所在翕的時陣，阮毋知影彼个地名，問工作人員得著的答案佮網路頂懸看著的可能就無仝，有的時陣嘛無機會拄著在地人，所以就無法度知影。親像講楠梓，就袂講Lâm-tsú，會講Lâm-á-khenn；閣親像燕巢，有Iàn-tsâu嘛有Iām-tsô，到底欲唸啥？其實你去進前真正毋知影。所以阮錄這个節目心適的所在是你會當因為這个節目熟似一个字伊有真濟種唸法。

台語台台長—呂東熹：

頭拄仔元長嘛講毋著，毋知影的人會講Guân-tiông，其實在地人是講Guân-tsióng才著！因為伊的「長」原來是手掌的「掌」，是後來才改的。

台語台行銷企劃—莊靜茹：

好，這爿想欲問逸嘉你進前敢有坐巴士去旅行抑是家己自助旅行的經驗？

《行仔內ê話》主持人—王逸嘉：

按呢我來分享我進前自助旅行的經驗。

逐家應該攏知影我六月份有去泰國𨑨迌，毋過我坐的毋是巴士，是『嘟嘟車』，伊是泰國的一種交通工具。

我感覺足趣味的是𪜶的喇叭其實是一種囡仔的𨑨迌物--『尖叫雞』，毋過彼个𨑨迌物的聲音其實真細，咧外口駛根本都聽無，所以其實攏是坐的人家己聽歡喜的，真趣味！而且佇台灣坐車的時陣，你無法度佮司機講價，毋過佇泰國的時陣就會使。這件代誌對我來講嘛足趣味的，因為去旅行就是一種生活的體驗，會當去熟似無仝款的人，嘛會當體驗無仝款的交通工具。

台語台行銷企劃—莊靜茹：

台長你敢有啥物經驗？

台語台台長—呂東熹：

這愛講著三、四十冬前，我大學的時陣有接《中央日報》的散工，去推銷報紙。彼陣攏是大學生去報名，總共分做4隊，阮彼隊是對基隆出發，佇基隆坐客運到宜蘭以後盤火車，經過花蓮、台東、西部，最後一站到桃園。阮坐臺汽客運的金馬號到屏東，佇屏東推銷報紙的時拄著一个毋知講啥物腔的人，對厝內喝講：「小等一下！」等規晡結果出來的是一个阿啄仔，伊的台語好甲我聽袂出伊是外國人，你若是無看著伊本人毋知影伊是外國人。

台語台行銷企劃—莊靜茹：

阮《無事坐巴士》內面嘛有一个外國主持人，逐家敢知影叫啥物名？

著，就是吉雷米（一粒米），伊嘛是一个外國人，這馬咧主持阮的節目。

最後問台長《無事坐巴士》這个節目想欲予觀眾啥物款正面的影響？

台語台台長—呂東熹：

因為這馬巴士咧行的路通常較偏僻，庄跤真濟的巴士攏無人坐，因為這馬逐家攏有交通工具，親像台北到台中的巴士，真濟攏會經過田庄，𪜶經過的所在根本就真少有人徛家生活，毋過這寡所在其實是較有人情味的所在。《無事坐巴士》其實有環島一遍，因為希望會當行入去民間，阮有的時陣雖然會去較有名的所在，毋過大部分攏是庄跤所在，因為這寡所在真有人情味，嘛有真濟的故事。

《無事坐巴士》是阮台語台創台以來，節目內面收視率上好的！佇公視所有的節目當中，伊嘛會當有前五名的成績。

台語台行銷企劃—莊靜茹：

而且閣會有真濟觀眾敲電話來問主持人去的是啥物所在，因為𪜶嘛想欲去。所以真正是足濟人咧看阮這个節目。

最後，想欲請瑞夫來宣傳這个節目。

《無事坐巴士》主持人—張瑞夫：

好，無看過的人轉去以後，拜五暗時十點的第14台準時收看，若是厝內無電視請恁拍開Youtube揣公視台語台，公視台語台會佇面頂做伙放送。今仔日袂赴看嘛無要緊，因為拜六暗時六點、拜一早起七點佮下晡四點會閣重播；若是閣無看著，Youtube頂懸嘛揣會著。

頭拄仔有講著阮有坐巴士環島，拄仔好今仔日轉去就會當看著，因為阮這遍特別的企劃就號做「後班車J個力」，阮真正會𤆬逐家坐巴士環島。請逐家一定愛共阮支持，多謝逐家！

台語台行銷企劃—莊靜茹：

紲落來欲共逐家紹介的是《行仔內ê話》，這个節目現場的人一定攏無看過，今仔日嘛是台長頭一擺看阮的節目。《行仔內ê話》是阮台語台全新的節目，《行仔內ê話》會𤆬逐家來熟似傳統行業內珍貴的技術佮文化，而且會透過一寡俗語來熟似傳統行業內的僻話，展現台語上有特色的地方腔口。所以這遍就綴阿嘉的跤步，看伊欲𤆬咱去體驗佗一个行業！

(影片放送)

台語台行銷企劃—莊靜茹：

這个節目就是阮南部中心製作的新節目。逐家攏知影阿嘉進前捌主持過其他節目--《收成ê彼一工》，這遍主持《行仔內ê話》的時陣，你感覺你講台語的時陣敢有啥物無仝？

《行仔內ê話》主持人—王逸嘉：

應該是有進步！逐家攏知影我是大學才開始接觸台語，包括：羅馬拼音按怎寫、按怎讀，台語愛按怎聽、按怎講。其實彼个時陣嘛是台長建議我去報名《收成ê彼一工》，彼時陣我的台語才學一冬爾，我這馬轉去聽彼个時陣講的台語，已經是會感覺礙虐的程度矣，所以就代表我的台語應該是有進步。

《行仔內ê話》其實有請台語老師佇邊仔糾正我的台語，因為製作人佮導演知影講我的台語其實無遐爾好。所以若是拄著我袂曉講的所在抑是講毋著，老師就會佇邊仔隨共我糾正，這種隨改隨學的方式嘛是我台語會當進步的原因。閣有另外一个真厲害的台語老師，伊會當馬上隨編四句聯，佇拄才影片內面我講的四句聯，就是彼个老師佇邊仔聽我咧創啥物，等我錄了以後伊就共寫好的四句聯提予我唸。這是我台語進步的另外一種方式。

台語台行銷企劃—莊靜茹：

所以你其實因為沓沓仔接觸著台語的關係，台語嘛漸漸仔有咧進步。

逐家攏知影阿嘉進前有足濟表演的經驗，你感覺表演的經驗主持語敢有啥物幫助？

《行仔內ê話》主持人—王逸嘉：

逐家應該攏知影我進前是AKB48 Team TP的成員，上大的幫助一定就是袂驚鏡頭，因為我已經看鏡頭五冬矣！所以我這馬翕的時陣其實毋驚鏡頭，有的時陣採訪的頭家就會共我呵咾講：「你這个年歲袂驚鏡頭，是足厲害的一件代誌！」若是我今仔日是一个無經驗的人，我一定會足驚的，而且對鏡頭講話會無自信，眼神毋知愛看佗位。

而且閣會當練習我的表情，因為咱一般咧聽頭家講話的時陣的反應會是共伊頕頭爾爾，毋過因為錄節目的關係，所以我一定愛有足濟活潑的表情，愛予頭家反應，嘛愛會曉接話；若是無按呢，看電視的觀眾就毋知影我這馬的情緒到底是啥。而且佇節目當中嘛會講話、訪問，所以對我來講是一个練台語的好機會！

台語台行銷企劃—莊靜茹：

按呢聽起來，毋驚鏡頭這件代誌，我想欲問瑞夫頭一遍錄《無事坐巴士》的時陣，你敢會驚鏡頭？

《無事坐巴士》主持人—張瑞夫：

我真正毋知影驚，因為我毋知影欲按怎做，所以我根本就毋知影面對鏡頭愛做啥物情緒、表情。第一遍錄影的時陣我真正袂緊張，顛倒是訪問我彼改我足緊張的！因為毋知影愛講啥。導演就共我講：「你講話就照你平常時講就好矣！因為你無需要表演。」

等到我第一改做主持的時陣，彼改我嘛想講照我平常時按呢就好，我真正就無緊張，結果我按怎做攏予人講：「你按呢袂使。」所以我後來主持的時陣嘛較無自信。

台語台行銷企劃—莊靜茹：

所以你尾仔是沓沓仔練起來的。

《無事坐巴士》主持人—張瑞夫：

著啊！因為我第一改錄了以後，轉去就攏會去看別人的表現。第二改錄影𪜶就共我講：「你有進步喔！」彼時陣自信才漸漸仔起來。阮的節目有真濟的主持人，每一个人的風格攏無仝款，毋過導演嘛有共我提醒：「你看別人的，你嘛免學別人按怎講話。」所以逐擺錄影攏是我學習的機會。

台語台行銷企劃—莊靜茹：

所以表演的經驗其實對阿嘉來講是足有幫助的。

影片內面欲去台南翕進前，你敢有做啥物功課？

《行仔內ê話》主持人—王逸嘉：

彼个亞鉛店佇台南其實是足有名的，所以伊的新聞攏真濟。毋過阮導演對我誠好、誠貼心，因為伊會佇翕進前共所有的資訊囥佇LINE群組內面，所以我錄影進前一定攏會看；而且導演佇正式錄影進前嘛會去看現場，家己翕現場的相片佮影片，然後才閣傳予我，我就會當提早知影錄影的環境生做啥款。

所以佇錄影進前一定愛看真濟網路面頂的資訊，因為我毋知影是啥物。親像錄影進前我嘛毋知影亞鉛是啥，因為彼毋是我平常時會接觸著的物件，我就先佇網路頂懸查亞鉛的資訊，查這个產業這馬拄著啥物困難，查伊會當做啥物款的產品。而且我一開始嘛毋知影亞鉛的台語愛按怎講，我去查了以後發現嘛會當講白鐵仔，毋過頭家講的亞鉛其實是日本的唸法，所以阮攏會照頭家的方式講，因為伊就是這个產業的專業。

佇咧阮錄影的前一工暗時，導演攏會揣我開會，會提醒我愛按怎開頭佮收尾，嘛會共我講這个頭家的個性是按怎，然後會當按怎應對。

台語台行銷企劃—莊靜茹：

你體驗亞鉛以後感覺這个工課上辛苦的是啥物所在？

《行仔內ê話》主持人—王逸嘉：

我感覺傷熱，因為頭家做代誌的所在攏無冷氣；而且家私真正足重的，我才提幾分鐘，我的手就已經擋袂牢矣，然後嘛真歹控制；逐家看我影片內面的表現可能會想講我咧做效果，其實彼是我真實的反應。

因為導演一直想欲共我變做公視台語台的森川葵，雖然我嘛是想欲共逐項代誌做甲像伊遮爾好，毋過真正有淡薄仔困難。上尾我欲徛起來的時陣，導演就共我講：「差不多會當去揣頭家矣。」毋過我的跤煞麻去徛袂起來。最後我有問姊姊(頭家的查某囝)講：「平常時攏會做偌久？」伊共我講：「通常會坐規晡，嘛無法度食飯，愛全部做了才會當歇睏。」

台語台行銷企劃—莊靜茹：

我嘛想欲問瑞夫，因為恁兜是做洗衫店，想欲問洗衫店敢有僻話？抑是一寡俗語會當共逐家分享。

《無事 坐巴士》主持人—張瑞夫：

我感覺有真濟的用詞佮頭拄仔亞鉛的產業真相，嘛是一代、一代傳落來的，毋過我無確定敢會當算是巷仔內的話無，親像『襯衫』逐家會講siat-tsuh，毋過阮兜會講tshùn-i，恁應該無聽過；猶閣有『蒸氣』恁可能會講tsing-khì，毋過阮兜攏講iò-khì；最後，『這一批、那一批』的講法，阮通常會講這批佮彼批，阮兜攏講這幫、彼幫。雖然我毋知這敢是日本的唸法，抑是我阿媽家己發明的，毋過阮真正攏按呢講。

台語台行銷企劃—莊靜茹：

最後問台長，是按怎當初南部中心會製作《行仔內ê話》這个節目。

台語台台長—呂東熹：

台語台的本質猶原是電視節目，若是節目是教人台語，啥人會想欲看？所以阮創台第一年有一个節目是--《逐工一句》，伊就是用表演的方式教人按怎講台語。南部中心開始籌備的時陣，因為考慮著南部人的台語較好，所以就開始規劃《行仔內ê話》，想欲透過短片的方式取代廣告時間，按呢就每一个時段攏會當放送矣，因為公共電視台是用國家預算編的，袂用得囥別人的廣告。

亞鉛這个詞我嘛是第一遍聽，我細漢的時有聽過鉛，所以我知影；毋過我有聽過人講白鐵仔。是巷仔內的人才會叫伊亞鉛。瑞夫拄才講的例嘛是巷仔內的話，其實有足濟的話攏是巷仔內的人才知；就親像你去菜市仔買魚，若是毋捌煮食、買菜的人，根本就毋知按怎分辨𪜶無仝的所在。

所以阮台語台希望會當透過這改的新節目予逐家熟似巷仔內的話，而且閣是揣遮爾古錐的姑娘來做主持人，拜託逐家加幫阮宣傳。

台語台行銷企劃—莊靜茹：

最後請阿嘉來宣傳新的節目。

《行仔內ê話》主持人—王逸嘉：

《行仔內ê話》會佇11月的時陣開始放送，請逐家繼續支持公視台語台，絕對有14！

台語台行銷企劃—莊靜茹：

阮新的節目會佇11月的時放送，所以逐家若是想欲知影當時會當看著這个節目，會當關注台語台的面冊。最後嘛感謝台長、瑞夫猶閣有阿嘉的分享！

這馬欲進行的是QA問問題的時間，若是有問題想欲問的人會當夯手！

民眾1：

我想欲問台長，頭拄仔台長有講著欲準備做戲劇，咱台灣的戲劇市場過去一直攏是予華語占牢牢，所以對華語戲劇內講台語的人攏會有『刻板印象』，通常攏是歹人、衰人，無就是好笑的人……台語台的戲劇會按怎改變這種狀況？

台語台台長—呂東熹：

其實阮做台語台、做戲劇就是為著這个目的，古早八點檔若是講台語，攏予人一種無水準的印象，所以阮的戲劇會真注重劇本。因為這馬的八點檔攏是那寫那拍，按呢的劇本哪有可能好？阮這馬所有的劇本攏會審過，舊年開發的劇本到今年猶未寫好。咱台灣真欠戲劇，台語的戲劇是閣較少，所以阮今年年底進前會徵選劇本，劇本會有兩个方向，一个是一般無主題限制的劇本；另外一種是台灣文學的劇本，希望會當共台灣文學改編做連續劇，這是公開徵選的部分。毋過阮目前有開始徵選一寡原來台灣的劇本，有兩个，一个是台灣查某人的故事；另外一齣是bàng-gà改編的電視劇，這馬當咧寫劇本。另外閣有佮文策院合作有關警察的劇本。

因為戲劇才是會當共觀眾𤆬入來的，阮台語台第一年開播收視率上好的有《苦力》，《苦力》是公視佮台語台連播的。第二齣是阮和民視合作的《孟婆客棧》，《孟婆客棧》是阮台語台創台以來收視率上懸的戲劇。因為戲劇足開錢嘛足開時間，若無較濟的籌備是無可能共這拍予好，所以才會按今年就開始準備明年甚至是以後的連續劇，而且內面的戲劇攏足有水準的，請恁放心！

最近《苦力》的導演--李岳峰，翕新戲《牛車來去》的時陣，錄到一半就共伊頭殼內的畫面講予演員理解，實在有夠𠢕！李岳峰佇公視閣有拍一支片--《後山日先照》，逐家攏知影伊雖然是講花蓮的故事，毋過其實是咧暗指鳳林的白色恐怖。

阮希望台灣會當拍一寡較現代的作品，拍比八點檔閣較有水準的八點檔，按呢少年仔、一般大眾嘛較會愛看！

另外，明年二月台語台有一齣新籌備的戲劇--《鹽水大飯店》，伊是一个寫高雄橋仔頭立法委員—戴振耀的故事，伊是第一个用台語質詢彼時行政院長—郝柏村的人。阮內部已經看過新片，實在有夠讚！所以明年二月會當期待阮第一部完全家己籌備、製作的電視劇。

民眾1：

想欲問阿嘉會用啥物方式佇社交媒體推廣台語？

《行仔內ê話》主持人—王逸嘉：

Instagram的文章我有的時陣會用台文字書寫，毋過後來接著較濟商業合作的宣傳，所以最近較少寫全台語的文章，會改換做用華語為主，然後台語輔助的方式寫文章。雖然真濟人講台語是無文字的，毋過我認為若是有文字記錄，其實是較好保留落來的，所以希望逐家會當多多學習台文！

民眾2：

我是最近才開始學台語的，所以我想欲先強調一件代誌，阮應該共「國語」這个詞改講做「華語」，因為這馬每一種語言攏是國語矣！

因為我這馬有咧學台語羅馬拼音，毋過我發現節目的文字攏是以漢羅書寫為主，我想欲問台長敢是有啥物考慮才會按呢做？猶閣有想欲問台語台以後是會去推廣漢語羅馬拼音？抑是會推廣台語羅馬拼音？

台語台台長—呂東熹：

這問題對創台以來真濟人咧問，其實阮台語台的字幕有真濟種，一種是台文；一種是華文佮台文做伙用，親像《無事坐巴士》就是下跤用華文字幕，頂頭用台文；另外閣有一種是全華文；嘛有台文加羅馬拼音的。

有一寡羅馬拼音派的人嘛會共阮講：「愛加用一寡羅馬拼音。」𪜶認為學羅馬拼音對學語言真有幫助，因為音標才是上正確的。毋過因為咱台灣受著漢字文化的影響真深，所以大部分的人猶是較會當接受漢文。

其實500年前就已經開始有台語漢文矣，咱台語第一部台語漢文作品是《荔鏡記》，嘛有人講伊是《荔枝記》，其實內面就是歌仔戲《陳三五娘》的故事，毋過《陳三五娘》的劇本是用泉州話去拼音的，若是你用這馬的中文去看伊的文字，你無法度理解伊咧講啥物。

所以台文目前揣著上早的紀錄是500年前，落尾一寡七字仔、歌仔冊其實嘛會當看著台文。這馬逐家上有印象的其實是khà-lah Oo-khe，古早的khà-lah Oo-khe內面其實攏是一寡無標準的台文，彼是因為咱有學過才知影。大多數的台灣人無學過羅馬拼音，若是猶是選擇用台羅字幕，其實逐家看無啦！而且彼字幕真緊就過去矣，你嘛看無，所以阮的字幕才會攏用華文，無就是台文。

用華文是因為考慮著預算佮時間的關係，因為有一寡片是用買的，阮為著欲省時間就袂去改字幕，干焦會換配音。毋過所有阮家己製作的節目，《行仔內ê話》、《無事坐巴士》全部攏是用台文；阮這馬用的是教育部版本的，但是教育部版本的嘛是真濟人咧批評，這嘛是事實，因為教育部版本的是建議用字。

一寡羅馬字派的人拄著我攏會共我講：「恁台語台愛加用一寡羅馬字啦！」親像《全家有智慧》伊是外製節目，毋過阮有規定節目內面的小單元抑是教學的部分，你就愛用台文佮羅馬字。《行仔內ê話》前身--《逐工一句》就有規定愛有台文佮羅馬字，因為阮嘛是愛推捒羅馬字。雖然我的羅馬字干焦學三個月，到這馬猶是無啥會曉寫，毋過我嘛認為學語言用羅馬字去學上緊，我捌拄著一个德國來台灣讀冊的人，來台灣三個月煞會當用台語和台語文團體的人交流，內容攏是一寡對我來講真深的台語文智識。雖然講羅馬字毋是阮主要推捒的目標，毋過阮猶是有咧推廣，因為阮嘛是希望會曉用羅馬字的人會當愈來愈濟。

民眾3：

拄才《無事坐巴士》的主持人講熨衫會有iò-khì，這種講法應該是對日本過來的，日語是講じょうき(jouki)，就是『熱氣』的意思，這種講法嘛已經漸漸予人放袂記矣。我這幾年一直攏有咧收集已經真罕得聽著的台灣話，我所收集的應該有一寡是恁毋捌聽過的。

這幾年咱政府所推行的台語教育，是真有前途嘛真正確的代誌，毋過伊的方法毋著。不管是小學抑是國中，台語教的攏是教一寡簡單的物件，我認為台語應該愛對基礎開始，尤其是發音，咱攏無對這方面落工夫。像網路頂懸真濟教拼音的老師，可能是因為時間有限的關係，𪜶攏無教「拼音一定愛準」，佇我的想法當中，逐家的拼音一定愛準才會使。因為這種代誌無法度馬上就會曉，伊需要一直練習才會使，所以我才認為這件代誌真重要！台語有一句話號做：「三日無餾，𬦰上樹。」就是按呢。所以學台語真正愛對基礎釘根！

民眾4：

我有看著台語台有《史努比》的台語配音，若是想欲囡仔開始學台語我就會予伊看。想欲請問未來敢有其他台語配音的bàng-gà？抑是共經典電影改做台語配音的計畫？

公視台語台行銷企劃部經理—劉桂蘭：

若是有啥物建議攏會當共阮講。

頭拄仔有一个人有講著《SPY×FAMILY》，其實12月的時陣就會佇台語台放送矣！另外閣有《派對咖孔明》嘛是馬上就會佇台語台放送，所以請逐家一定愛繼續關注第14台—公視台語台！

民眾5：

我想欲問《無事坐巴士》節目內底所拜訪的所在，有偌濟是事先安排好的？另外閣有偌濟是拄好拄著的？

我嘛想欲問台長一寡問題，新聞主播咧報物件的時陣攏會有新詞出現，我嘛知影台語台有家己的新詞辭庫，我想欲知影辭庫佮教育部的辭典敢會有關聯？

《無事 坐巴士》主持人—張瑞夫：

我先來回答第一个問題，《無事坐巴士》的每一个受訪者攏有事先聯絡，毋過毋是主持人聯絡的，是阮的製作人、導演事先聯絡的，嘛會親像阿嘉𪜶仝款，愛先看欲按怎翕；另外受訪者看鏡頭的時陣可能會驚，所以愛先講予好勢，予𪜶知影阮會問啥物問題。

阮有7个主持人，每一位主持人處理代誌的方式攏無仝，我第一改錄影做非常濟的功課，甚至是受訪者蹛佗位攏共查出來，結果因為我傷了解，好奇的感覺煞無去矣。所以我這馬干焦會知影欲去佗位，然後知影可能會創啥爾爾，因為按呢較會當用觀眾的角度去看代誌，做伙體驗毋捌做過的代誌。

公視台語台台長—呂東熹：

彼个新詞其實就是文化部的政策，舊年的企劃書就是叫阮至少愛做一千个新詞，因為語言是隨時代變化的，若是無對時代演進，你的語料會愈來愈少。以前嘛無手機仔，手機仔出來的時陣嘛毋知影『滑手機』愛按怎講，有講掰的，嘛有人講𫝻的；親像我以前嘛毋知影啥物號做手摵茶。

所以阮的新詞其實是中央的政策，因為文化部無可能家己做，若是家己做會是揣學者，毋過會真慢；阮家己嘛有請一寡學者，逐個月攏會開會討論，開會的結果嘛毋是每一个人攏滿意，毋過語言就是愈濟認同，伊就會變做主流。

親像拄才民眾3所講的iò-khì，這个詞已經變成巷仔內的話矣。以前無台語台的時陣，我是台語新聞的製作人，逐工攏會有人來問我新的物件愛按怎講，毋過我嘛毋知。所以文化部希望台語台新詞辭庫，透過公布資訊予逐家知影新詞，新詞若是聽久、講久逐家就知矣。

民眾6：

我想欲問逸嘉，你有講你是大學才開始學台語，為啥物上大學以後忽然會想欲學台語？

《行仔內ê話》主持人—王逸嘉：

其實我一開始對台語無啥物了解，開始學台語以後接觸著台語以外的代誌，譬如講文學、台語文化，毋過佇咧我學台語進前其實有學過南管佮北管，所以對台灣的文化猶是有淡薄仔了解，共文化學起來以後這馬開始學語言，希望會當共台語的語言佮文化攏推捒出去！

公視台語台台長—呂東熹：

我來補充一件代誌，這馬大學有真濟的台文系抑是台文所，伊其實包含三个領域，一个是台語、一个是台灣文化、一个是台灣文學，每一个學校的台文/台語系的專長攏無仝款，有的強調文學，有的強調語言，有的強調台灣文化，親像師大就是三个攏強調，你讀這毋是干焦學語言爾爾，若是對民俗真有興趣嘛會當學。所以阮台語台是台語系畢業入來的人上濟，因為阮就是會用著台文，其他的學生嘛毋捌學過，干焦台語/台文系的人會曉，所以𪜶若是來應徵，錄取的機會一定較懸。

台語台行銷企劃—莊靜茹：
好，咱嘛多謝台長！今仔日的時間到遮嘛差不多矣，最後希望逐家開一點仔時間幫我寫問卷，若是拄著啥物困難會當夯手。